Sən bizimsən, bizimsən... Azərbaycan!!!
28 May – hər bir azərbaycanlının vətəndaşlığını məlum edən şəxsiyyət vəsiqəsinin üzərində qeyd olunan Azərbaycan Respublikasının günüdür. Respublika tarixi başlayır bu gündən, əvvəli gözəl, sonu isə əbədi olan Respublikamız.
Həmin dövrün qərarlarını nəzərdən keçirəndə bir anlıq o günlərin hadisələri insanın gözü qarşısında canlanır. O tarixi dövrə qiymət vermək də olar, verməmək də, amma fikir bildirmək istəyəndə ilk növbədə həmin dövrün ab-havasını bilmək gərəkdir, ən azı qərarların hansı şəraitdə qəbul olunduğunu...
Mənim üçün Azərbaycan Xalq Cümhuriyyəti, və yaxud, Azərbaycan Demokratik Respublikası vətəndaşı olduğumuz dövlətin adıdır. Bu ad o qədər insanların beynində həkk olundu ki, sovetlər də bu adı dəyişə bilmədi və bizi adımızla, sərhədlərimizlə SSRİ-yə daxil etdi. Xalqların tarixində bu bəlkə də ən önəmli hadisələrdəndir. Məhz 1918-ci il 28 May tarixi millətimizin özünümüəyyənetmə prosesinin yekunu oldu. Bu gündən etibarən dövlətimizin əsası qoyuldu ki, bu da gələcək nəsillərə Vətən anlayışının dəqiq olaraq dövlət formasında çatdırılması idi.
Əlbəttə, şəxsiyyətlər bu fikri inkişaf etdirib praktiki addımlarla yekunlaşdırdılar. Bunların sırasında Məmməd Əmin Rəsulzadə, Əlimərdan bəy Topçubaşov, Fətəli xan Xoyski, Əhməd bəy Ağayev və digərləri öz əvəzolunmaz töhfələrini verdi. Onların fəaliyyətlərini öyrəndikcə insana elə gəlir ki, onların nə ailəsi olub, nə gündəlik problemləri, nə də ki, nəfsə tabeçilik. Onlar ömürlərini vahid məqsədə bağışlayan insanlardır və bu amil yüz ilə yaxın bir dövrdən sonra bizə örnək olmalıdır. Tarix unudulmamalıdır, tarixi hadisələr hər xalq üçün dərs olmalıdır.
Hərdən bizdə nəsə alınmayanda, ümidimizi itiririk, bədbin oluruq, əl-qolumuzu aşağı salıb unuduruq. Amma öz Vətənindən didərgin düşən insanlar, Azərbaycan Xalq Cümhuriyyətini quranlar 1920-ci ildə uzaqda olsalar da, ümidlərini itirmirdi, Azərbaycanın himni ilə öyünürdü, azərbaycanlıları birləşdirib işlər görürdü.
Yaşadığımız illərdə qazanılan müstəqilliyimizi möhkəmləndirməliyik, ölkəmizi inkişaf etdirməliyik, fəaliyyətimizi vahid məqsədə yönləndirməliyik.
Bu istəklə yaşayan, Məmməd Əmin Rəsulzadə ömrünün sonunda 3 dəfə “Azərbaycan” deyib dünyasını dəyişib.
Elə onun sözlərini sonda yazmaq istərdim:
“Sən bizimsən, bizimsən!
Durduqca bədəndə can,
Yaşa, Yaşa, çox Yaşa!
Ey şanlı Azərbaycan!”
Baxış sayı: 111
Açar sözlər: adr90 azərbaycan respublika cümhuriyyət
